அடியானின் குருநிலை விளக்கமாக அன்றைய திருச்சி மாவட்ட அறிமுகத்தார் ஒருவருக்கு குருதேவர் கூறி எழுதப்பட்ட அஞ்சல் வடிவக் கட்டுரை முதலாக உள்ளது. இதன் மூலம் குருதேவர் சாதாரண சித்து விளையாடல் காரரோ, கூட்டத்தைச் சேர்த்து வர்த்தகமாக்கிச் செயல்படும் சாமியாரோ அல்ல; ஆனால், ஒரு மாபெரும் தத்துவத்தின் வாரிசாகவே செயல்படுகின்றார் என்பதனை புரிந்து கொள்ளலாம்.
அடுத்ததாக, தாம் நடத்தும் இயக்கத்திற்கு பொருளுதவியை பெறுவதைக் கூட முன்பின் அறியாதவர்களிடம் நன்கொடையாகப் பெற்று விடாமல்; சித்தர் நெறித் தத்துவத்தை அறிந்து, புரிந்து, செயல்படுத்திட முன்வருபவர்களிடம் மட்டுமே கேட்டு, அவர்களால் வழங்க முடிந்ததை மட்டுமே ஏற்றுச் செயல்படுத்தும் முறையையே குருதேவர் பின்பற்றுகின்றார் என்பதனை விளக்கும் அஞ்சல்கள் இரண்டு உள்ளன.
காரைக்குடி வட்டார அடியான்களுக்கு அருட்பணி விரிவாக்கத் திட்ட செயல்நிலை பற்றிய ஐய விளக்கங்களை வழங்கும் அஞ்சல் அடுத்து உள்ளது.
ஏற்கனவே சித்தரடியான் நிலை விளக்கம் என்ற தலைப்பில் 4 கட்டுரைகள் வெளியாகின. இதன் தொடர்ச்சியாக குருதேவர் எழுத விரும்பிய கட்டுரைக்கான குறிப்புக்கள் மட்டுமே உள்ள நகல் அடுத்ததாக இருக்கின்றது.
இறுதியாக இந்து மறுமலர்ச்சி இயக்கத்தில் சேருங்கள் என்று அழைப்பு விடுக்கும் அறிவிக்கை உள்ளது.