இந்து மறுமலர்ச்சி இயக்கத்தின் ஆங்கிலம் மற்றும் வடமொழிகள் பற்றிய கொள்கை விளக்கங்கள்.
கி.பி. 1772இல் மூன்றாவது முறையாகக் கலியுகத்தில் தோற்றுவிக்கப்பட்ட இந்து மறுமலர்ச்சி இயக்கத்தின் மொழிக் கொள்கை விளக்கங்கள் இந்த பதிவில் உள்ள கட்டுரைகளில் வழங்கப் படுகின்றன. கலியுகத்தில் முதலாவதாக கி.மு. முதலாம் நூற்றாண்டில் இந்து மறுமலர்ச்சி இயக்கம் (இ.ம.இ.) பத்தாவது பதினெண்சித்தர் பீடாதிபதி அவர்களால் துவக்கப்பட்டது. பின்னர் மீண்டும் கி.பி 8ஆம் நூற்றாண்டு வாக்கில் இந்த இ.ம.இ. பதினோராவது பதினெண்சித்தர் பீடாதிபதி அவர்களால் துவக்கப்பட்டது.
அவ்வக்காலச் சூழ்நிலைகளுக்கேற்ப இந்து மறுமலர்ச்சி இயக்கம் தனது கொள்கைகளை விளக்கமாக வழங்குவது பதினெண்சித்தர் பீடாதிபதிகளின் மரபு. அதற்கேற்பவே பன்னிரண்டாவது பதினெண்சித்தர் பீடாதிபதி அவர்கள் திருத்தோற்றம் எடுப்பதற்கு முன்னரே அவசர அவசியத் தேவைகளினால் சித்தர் ஏளனம்பட்டியார் அவர்களால் இந்த இ.ம.இ. ஆரம்பிக்கப்பட்டது. அவரே முதலாவது இ.ம.இ. தலைவராகச் செயல்பட்டார். அவருக்குப் பின் சித்தர் காக்கையர் ம.பழனிச்சாமி பிள்ளை அவர்கள் இ.ம.இ. தலைவராகப் பொறுப்பேற்றுச் செயல்பட்டார். 19 மற்றும் 20ஆம் நூற்றாண்டுகளின் காலச் சூழ்நிலைகளுக்கேற்ப இருவரும் வழங்கிய சமசுக்கிருத மொழி, இந்தி மொழி, ஆங்கில மொழி பற்றிய இ.ம.இ.யின் கொள்கை விளக்கக் கட்டுரைகள் இந்த இதழில் உள்ளன.
முதலிலும் இறுதியிலும் வேறு இரு கட்டுரைகள் உள்ளன. முதலில் விரகாலூர் அடிகளார் அவர்களுக்காக வழங்கப்பட்ட நட்பு நாடும் திருமடல் உள்ளது. இறுதியில் கவிஞர் ஆண்டான் என்ற புனைப்பெயரில் சித்தர் காக்கையர் வழங்கிய 'தமிழ் வழி இன விடுதலை' என்ற கவிதை உள்ளது.